أصبح كل من هب ودب ينشر مقال أو رأي بيهاجم فيه التنمية البشرية ويسخر منها، وأصبح الهجوم على التنمية البشرية من علامات الثقافة تقريباً أو دلالة على العمق، زى إنك تسمع منير أو تروح ساقية الصاوي أو السلوكيات دى

فهجومك على التنمية البشرية دلالة على إنك مثقف !!!!

وآه فيه نماذج مش كويسة في التنمية البشرية بس تعالى أقولك النصابين في مهنتنا هما مين:

في الوقت اللى حضرتك فيه مش بتفتح كتاب تقراه، فيه واحد ماسك الكتب وشغال مذاكرة وتحضير وتبسيط عشان خاطر حضرتك تفهم وتتعلم

في الوقت اللى أنت قاعد متكلفت فيه في بيتكم من الساقعة ومكسل تغسل وشك، فيه واحد شايل شنطته على كتفه ونازل يتمرن تمرينات نفسية وبدينة عشان يطبق كل اللى بيشرحه لك

في الوقت اللى حضرتك فيه بترفض العلم وبتسخر منه، فيه واحد بيتشقلب زي القرد وبيجيب نكت يمين وشمال عشان خاطر يحببك في العلم ويعلمك حاجة، وقرب يشحتك عشان خاطر تستفيد منه

في الوقت اللى معاليك بتحضر فيه كورس وتتمنظر على المدرب وتهريه مناقشات، بيكون هو صدره واسع ورامي حياته كلها ورا ضهره عشان يركز معاك

في الوقت اللى حضرتك بتشتم فيه المدرب عشان خاطر مردش على رسالتك على الفيس، بيكون المدرب دة ملكية عامة، و24 ساعة بيرد عالناس وكأنهم اشتروه.

في الوقت اللى حضرتك فيه مكسل تفتح كتابك تذاكر، بيكون المدرب قاعد بيترجم ويتمرن ويجمع مناهج عشان خاطر يعمل لك منهج يفيدك

في الوقت اللى بيكون فيه حضرتك نايم، بيكون هو بيتابع متدربيه في كل حاجة بيعملوها عشان يحاول يخليهم أحسن

في الوقت اللى حضرتك قاعد على كرسي في قاعة التدريب بتسمع ومريح رجليك، فيه مدرب واقف زي الألف وبيتنطط ومسخر نفسه كخادم مطيع لحضرتك.

في الوقت اللى حضرتك بتستخسر تدفع تمن محاضرة، وتروح تشتري سندوتش أفضل، فيه مدرب بيبع اللى وراه واللى قدامه عشان يشتري مراجع يقدر يفيدك بيها.

في الوقت اللى أنت بتسخر فيه من المدرب إنه جايب معلوماته من كتب، مسألتش نفسك أنت ليه مقرتش الكتب دي زيه

ومسألتش نفسك إيه المجهود اللي بذله عشان يقدر يبسطلك المعلومة أوى كدة

في الوقت اللى معاليك قاعد عالقهوة، فيه مدرب بيبذل عمره ووقته عشان يروح يتعلم ويرجعلك يفيدك ويعلمك.

في الوقت اللى أنت بتهاجم فيه المدرب، هو كل همه إنك تحضر عنده على أمل ياخد ثوابك.

في الوقت اللى بتسخر فيه من إن المدرب معرفش يرد على سؤالك، تناسيت هو في المقابل يعرف كام معلومة أنت متعرفهاش

عزيزي المتدرب

المدرب دة بني آدم بذل عمره كله

يحضر

يتعلم

يذاكر

يتمرن

عشان يقدر يفيدك، هو مش عالم من العلماء، هو ناقل للمعرفة

استفيد بيه .. متحبطوش، صدقني هو مش ناقص

يارب تستفيدوا كلكم

مشاركة المحتوىShare on Google+Tweet about this on TwitterShare on LinkedInShare on Facebook